ოპერაციის შემდეგ თქვენ გადაგიყვანენ პოსტოპერაციულ პალატაში. გარკვეული დროის განმავლობაში თქვენს მდგომარეობას დააკვირდებიან სპეციალური მონიტორის საშუალებით. პოსტოპერაციული პერიოდის გასვლის შემდეგ გადაგიყვანენ ქირურგიულ პალატაში.
ოპერაციის დასრულებისთანავე, ქირურგი დეტალურ ინფორმაციას მიაწვდის თქვენს ახლობლებს ოპერაციის შედეგებისა და თქვენი მდგომარეობის შესახებ.
ოპერაციის შემდეგ შესაძლებელია გქონდეთ კათეტერები, დრენაჟები. გარკვეული პერიოდის განმავლობაში იქნებით მძინარე მდგომარეობაში. პოსტოპერაციულ პალატაში ოპერაციის შემდეგ მნახველები არ დაიშვებიან. გარკვეული პერიოდის შემდეგ შეძლებთ მიიღოთ სითხეები და ექიმის მიერ განსაზღვრული მსუბუქი საკვები. ახლობლებთან შეგეძლებათ ტელეფონით კონტაქტი.
სტაციონარში ნახვის საათებია 15:00-20:00. დაიშვება მხოლოდ თითო მნახველი, რიგრიგობით.
რამდენ ხანს მოგიწევთ კლინიკაში დარჩენა
საავადმყოფოში თქვენი დაყოვნება დამოკიდებულია ოპერაციის ტიპზე, ანესთეზიაზე და თქვენს ინდივიდუალურ საჭიროებაზე.
თუ ჩაგიტარდებათ მცირე ქირურგიული ჩარევა (დღის სტაციონარის პირობებში), ოპერაციის დასრულებიდან 1-3 საათში გაეწერებით.
საავადმყოფოდან გაწერა
კლინიკიდან გაწერის დღეს ექიმი გაგესაუბრებათ და ყველა საჭირო რეკომენდაციას წერილობით მოგცემთ. გაწერის შემდეგ, ექიმის მითითებით თქვენ დაგიბარებენ შეხვევის პროცედურებზე.